هذه ليلة اخرى من مساجلاتي مع الشاعر الكبير ادونيس محمد غلام ولكنها قديمة ..

علي قوادري
حسراه وكان عشب الدنيا يدوم**وتبقى لمتنا نجع وجموع
ادونيس
راح الزهو بقاتلي غير الهموم
وتفكرت أيام قاشينا مجموع
علي قوادري

كنت في زهو الدنيا نعوم**وليت وحداني مانيش مسموع
ادونيس
والنجع اللي كان فارسها مقيوم
راه بدل حالتو ولا مفجوع
علي قوادري

وش نحكيلك ياتراس اليوم**ضاع العمر طفا نعت الشموع
ادونيس
وأنا ضعت وكنت في ناسي معلوم
وياحسراه علي الناس مع الربوع
علي قوادري

وياحسراه ماعاد كاين كبير القوم**ماعاد الراجل في دارو مسموع
ادونيس
لو نحكيلك راك تبقى مصدوم
وجفونك تلقاها ويدان دموع
علي قوادري

احكي يا حكيم الزمان المذموم**سرك راه في بير الضلوع
ادونيس
لو نحكيلك ياعلي وش صار اليوم
أتقلي محال في قولك قنوع
علي قوادري

علمي بيك يا ادونيس عالم علوم**وراجل كلامك مرتب فيه قنوع
ادونيس
ونقلي ياغلام نخدملك مهدوم
تتبدل في حالتك ترجع مطبوع
علي قوادري

الراجل الزين بلسانو موشوم..اكلامو رصاص مافيه رجوع
يالوكان الدهر كامل يصوم**يبقى راجل مايهدو جوع
ادونيس
نافي حالي كي الي طالع سلوم
وخايف نهبط ياعلي نرجع مصدوع
علي قوادري

قلي يا صاحب القليب المكلوم**ننصحك نصيحة تفهم عني الموضوع
ادونيس
خايف نهدر يالخو نرجع مفهوم
ومن هذاك القول أنولي مصروع
علي قوادري

قلت نفاجي عنك يا مغروم**نجيب عليك قصايد زينة يا مولوع
ادونيس
قلبي راه أكحال كي مثل الجحموم
وفي السرعة فاقلي حتى الجربوع
علي قوادري

يالي داري بي راني مسموم**نتعذب الف مرة في أسبوع
ادونيس
أرميلي ياصاحبي عنك لهموم
قبل الحال الا يولي فيه رجوع

علي قوادري


جاني خمرك يسكر من الكروم**هيج خاطري قلبي عاد مقلوع
ادونيس
ياحسراه أيام فاتت قبل اليوم
وجمايع زينين من هذاك النوع
علي قوادري

كل شي مكتوب علينا مرسوم***لازم يكون بني ادم قنوع
ادونيس
لبستنا وبري مع الصوف المبشوم
والبرنوس يكون في القيمة مشنوع
علي قوادري

الصوف بيدين محنيين مرقوم**والزربية في المنسج المقلوع
ادونيس
وفراشات من الخمل غالي في السوم
وما يعرفهم قالي يعرف ذ النوع
علي قوادري

صنعت أما وحذاها خالتي فطوم**والخلالة والطعمة تبشم في المصنوع
ادونيس
ياحصراه أيام فاتو قبل اليوم
وقت الدقلة والحليب مع المطلوع
علي قوادري

والرفيس بدهان العرب معتق ومختوم**تاكل منو مغرف تولي مصروع
الخرفش لهاا مع الفقاع والزددوم**والفارس بالعود والشعر مولوع
ادونيس
والقصاب يكون في القصبة قمقوم
وحدة وحدة مايوليشي مسروع
مقامات من العروبي المعلوم
ويوزقها قاع بأنواع الطبوع
علي قوادري

ياي ياي ورقصة نايلية دوم**نرقص الليل كامل مانيش مخلوع
قصايد تحكي على ايام الروم**وغرام الليل اللي خلاني مقطوع
وحداني نحكي ونغني للنجوم**حكايتي معروفة في كل الربوع