قصيدة رثاء
يانايم تحت الحجر وتراب عليك=الحقت لموات وليت امعاهم
راقدين بين احيوط لا ما ياتي ليك=في جوف التراب نايم بحذاهم
في حفرة وسكرت لبواب اعليك=يا مقسى حجراتو متناهم
مادريتش وسط القبر يوم انخليك=واتعاشر للحاد يخفوك قطاهم
اللي سبقونا ماديد مساميك=وانتايا وليت في الجار امعاهم
اعمر كنت اقبيل في دارك ونجيك=ليالي ويام كانوا مضواهم
ماذا من اموال كانت بين ايديك=غانيم وابقار موسع مرعاهم
من بعد عجفوا وانساهم راعيك=قسموهم وراثهم وفرقناهم
كم من حوش كان بمفاتيحو ليك=قعدوا مغلوقين حزنوا بعزاهم
ماتفتحوا بيباننهم ولا شبابيك=فيهم صمت رهيب يخجل من جاهم
قولي يا بستان ذركه من يسقيك=يامعلى شجرات كانوا محلاهم
جفيت وعسلون ذركه غاب اعليك=في عشوة يبسوا ونزح ماهم
يالارض حتى انت اجزنت وشبيك=.....يسفاوا ذركه مقواهم
اسوادت لعطاف ملي غاب اعليك=قعدوا قفرة كي خطاهم مولاهم
الجرار اللي كان ايمطر فيك=مجاريثوا صداوا والتراب كلاهم
مايتلاش يدير دورة ولا يجيك=سكاتوا احفاووا والوقت فناهم
الطريق اللي كانت الباشي تطويك=صبحة وعشية تسير وتصفاهم
شيفورك ذركه رحل عاد مخليك=وعجاتك برد الليالي رشاهم
قوليلي حتى انت ماصاير فيك=وريني عفسات خويا وراهم
ولا حزنت مالقيتي من يديك=وجراحك ريح الشتاء راه اداهم
نطقت لي قاتلي راني نوريك=امفاتيحي في حياتو خباهم
ماخلاشي قاطفلة وتوريك=اتريح نبضات قلبك من داهم
قوي صبرك يالمجروحة نوصيك=الكبدة والقلب هذاك دواهم
بلقاسم جاب البيوت على اخيك=بصلاة الرسول ذركه ختمناهم
ياعالم بالسر مايخفاش عليك=وخلقت ثقلين حددت نهاهم.
تجعلني في الاخرة جار انبيك=اصحابو جميع نتبع خطاهم
كلش يفنى لا فقير ولا مليك=سبحان القدير واعد بفناهم
يبقى وجه اللي خلق مالو شريك=في الآيات الواضحة وقريناهم
تمت يوم 20سبتمبر 2002
24جمادى1423
شعر/زياني بلقاسم
ليست هناك تعليقات:
إرسال تعليق